Թորսթըն Օլե / Torsten Olle

Յոթերորդ զգայարան

Ես քեզ այնպես հաճույքով էի

նայում

երբ դու ծիծաղում էիր

մազերդ չորացնում 

մաքուր սավան գցում:

Ես այնպես հաճույքով էի

լսում,

երբ դու զարթուցիչն էիր դնում,

քնի մեջ շնչում

ու առավոտյան ցածրաձայն անիծում:

Ես քեզ այնքան հաճույքով էի

հոտոտում

ինչպես օրն էր քո-

վախը, ուրախությունը,

քրտինքը:

Ես այնպես հաճույքով էի 

համտեսում՝

լեզվով իմ

մաշկը քո շուրթերը

ցանկությանդ հետևում:

Ես քեզ այնպես հաճույքով էի

զգում,

ինչպես էիր դու

քեզ համահունչ

հավասարակշիռ ապրում:

Ես քեզ այնպես հաճույքով էի 

սիրում

բայց կար մի բան

որ հազիվ

մղում էր ինձ բանականության:

Հին երգ

Քեզ հետ ուզում եմ

լսել ձայնը անձրևի

կեչու մատղաշ տերևների մեջ

ու կաթիլները շուրթերից քո համբուրել:

Ուզում եմ քեզ մոտ լինել

երբ մոլորված ես:

Ծանր ծով: Նավը հատակին:

Երբ ջուրը կոկորդին է հասնում

ու չի լսվում որևէ ռադիոհաղորդագրություն:

Ուզում եմ պառկել կողքիդ

երբ շնչառությունը մեր հանդարտվի

երբ սիրենք իրար հպվենք իրար

մեջտեղում կյանքի:

Ուզում եմ քեզ մոտ լինել

երբ մոլորված ես:

Ծանր ծով: Նավը հատակին:

Երբ ջուրը կոկորդին է հասնում

ու չի լսվում որևէ ռադիոհաղորդագրություն:

Քո կողքին ուզում եմ ես

մեր սրտերի վրա ծիծաղել:

Քեզ հետ հանուն սիրո

ներում հայցել:

Ուզում եմ քեզ մոտ լինել

երբ մոլորված ես:

Ծանր ծով: Նավը հատակին:

Երբ ջուրը կոկորդին է հասնում

ու չի լսվում որևէ ռադիոհաղորդագրություն:

SMS

Ես չեմ գրում

ես չեմ կարդում

ես չեմ ապրում

ես սիրում եմ

քեզ

Փորի վրա

պառկած է կինը

ղունղունում է

ինչպես աղավնիներն են

երբեմն ղունղունում:

Մանուկն է ճկված

նրա մեջքին:

Ես նայում եմ դուրս

հեռու

հեռու ծովին:

Հավերժահարս

Միջօրեին նայում եմ ծովին,

եզրագծին հողի ու ջրի,

հազվադեպ են, իհարկե, Ֆրանսիայում կենդանիները:

Սեփական շղթաներն են կրում նեղ,

բրոնզե կմախքը շատ թեթև:

Թաց են մազերը գլխին

լողանալուց հետո ու բոլոր

որսորդները թախտերին.

հայացքն է նրանց արևահարվում

թավշե մորթուն:

Երեկոները լուսավոր ծիծաղ է հնչում:

Մեկը հավաքում է որսորդներին

ու սպանում նրանց արագ:

թարգմանությունը՝ Հերմինե Նավասարդյանի